الكتابة بالدارجة المغربية

  اللــغة كـوسييـلة تـواصـل للأفكـــار ، يجـب أن تـكو ن فـي متنــاول

الجمــيع : لذا الدارجـة أحـســن و أقــرب و أقـل تـعقيــدا للمغـــاربة

فـهـي لـغة حـية :

( عكـس الفـصحـى ،الـخــاصـة للـمثـقفـين ...شأ نهـا شأن اللاتـينيـة ...ستبـقى لـغـة الاســاقفـة عنـد الغربييــن ، والفـصحى للسلـفييــن المـوالـين عـاطفيـا ببقكر قومجي العربي)

اللـغة هي اللغة الأم ، والمتداولة يوميا لجميع شؤون حيـاتنــا

اللـغة هـي اللـي كـانحلمـو بهـا ، ونـفكـرو بهـا بـلا مجهـود ، وتقدم يها المسرح و الغتاء و زجل
.. ولا نحتاج  لسنوات  في حفظ قواعد معقدة و بعيدة على واقعنـا..

تشكراتنا لمن يبدل  مجهود للنـهـوض بلغتـنـا المغـربية

ساعة في السيبير

داك النهار مكاين ميدار للي خدام ولا ناعس فدارهم عييت من الدوران والعصير فالقهاوي دخلت أول سبير لقيتوا..السبيرات ديما كتلقا لبوسط للي فالقنت ولا مخبيين عامرين..للي كيشوف ليكرو بعين ويحضي يعين كنعرفوا اينا سيت جابد ولا للي مكتسمعش تقرقيب لكلافيي عرفوا كيتفرج فشي خاجة بحال وجهوا..بعض الظن اثم..

,واحدة باركة حدايا كدوي مع شي واحد من هادوك كتحلف ليه وتقول ليه هنكتب ليك هاد الكلمة..دايرة فيها حشمانة وخا كاين شي وحدات أنا كنحشم بلاصتهم.. مهم داير كاسك بلا صوت طالق وذني كنسمع ليها كتقول ليه بحب الراجل شجاع.. والقرد فرحان .

مقابل معايا واحد الدري كيستيتي مع شي كندية ولا فرنسية عندو مع فرونصي ديال ميدي 1. السبير فالليل كيكون زوين كسكونوا فيه غير هما..كنعرف وحدة ديما كذخل ضاربة المرطوب لوجهها هي وشي صحاباتها ولا خواتاتها..كاريين حدايا…وخا طالبات كنلقا فالطارو ديالهم فالصباح لفرماج والبيتزا ودانون..مكنقلبوش..أنا للعكس عندي فالدار مصنع لتدوير النفايات تاحاجة مكتلاح.

مهم هاد الأخوات الفاضلات كيدخلوا مول السبير كيبدا يفيبري كيركب ليهم لكام خاصة فيها الضو.. وللي بغاوها تجيهم فلبلاصة ونبدا نسمع فنايل سات اللهجات كلها خدامة ولبورطابلات كيصونيو..أما دراري مساكن محشرين تابعاهم لبطالة والهم والعقد..واحد بارك حدايا لقيتو كيقول ليا نحيد ليه لكام..يمكن شي وحدة قالت ليه دير لكام درتم معاه زوين خليه يفرح.

 وقيلا قال ليا انو كيشبه لرامي عياش..رامي عياش واكل التوكال..الدريات كيكونوا شابعين عياقة ومطلوبين..تزيد الهدرة مع وحدة تبلوكيك ولا تبغي تربيك..يمكن تلاقاها برا تصرفقها ولا متعقلش عليها..ولا للي عاد عرفتيها تقول لك قل لياشي حاجة فشكل لقيت أنا بعدا للي يقولها ليا..ايلا قلتي ليها تالغذا تقول لك مبرهش ولا معقد..ولكن ولابد كاين للي عقليتهم زوينة.. من جهتي كل للي تلاقيت معاهم من بعد الله يعمرها دار..
كاين للي زهروا غير فللي معندهم لكارت و كيدخل كيلقى راسو داير حضانة بلا رخصة.. ينصح هدا ويسكت هذه ..

هذا حال خوكم..كن كانوا عندنا قوانين مريكان كن طارو عليا شحال هاذي

ولد درب السلطان

شارع الفداء أو درب السلطان..معروف تما بقيسارية الحفاري والشاوية وزنقة الشمال..ولكن هاد القنت فالمغرب مش غير فكازا جامع كل الماركات.. للي بغا يشوف التسامح والتعصب يضرب لهنا.. تلقا الشلح والعروبي والفاس والريفي والجبلي..منعرف علاش مني كيتكلموا على المقاومة كيدكروا غير المدينة القديمة..نساو اصل كلمة الفداء..عزيز عليا ننزل لشارع الفداء فالليل ندور فيه..أمة لا اله الا الله كتكون خارجة.. وللي خدامين وللا متسكعين كيكونوا معمرين الطوبيسات.. 3 دراهم كافية.. كصكروط مخير ..كتجي فشكل يمشي لواحد لماكدو يصمكوه فالثمن ويبقى صيمانة يدور على فلوس ..ويخلي درب البلدية ..تمن ساندويش فماكدو يجيب لك نص كيلو شوا وبراد أتي ها.. زيد عليها المركوب والمصروف..حيت ماكدو مكاينش هنا ..يديروه حدانا يتمسخ..نيت أصلا حنا عزيز علينا التلصاق.. ماكدو مكيدخل ليه فميركان غير بوبي..عندهم ماكدو بحال سلطان العفن عندنا..هادي ماركة تجارية معروفة هنا..أشهرها محل كان فالشارع الفوقاني.. كدخل كتلقا واحد كيخور فنيفو كيسولك أش باغي..باقي كيقلي بزيت السيوف.. عندو من ديك الوقت..بغيتي ربع بدرهم ..نص بجوج دراهم..كضربو بزربة وتخرج..المشاش داخلين وخاجين..مشة مقطوع ليها الزنطيط.. هيكون غير داك السحار للي فالدرب..ديما ايلا بغيتي دخل خصك تاكل فقنت مخبي.. فالصغر كنت كنتخبا باش ميشوفنيش شي دري يلصقني ندوقوا .. دابا كنتخبا مشوفنيش شي حد يشد فيا..أش هادير ..من شب على شيء شاب عليه.. كاين شي محلات معرفت اش كيديروا ولكن عليهم النفاد.. محل سميتو كزوم فالدرب..فالساحة.. كيبيع نص بالطون.. زيد عليه كاس مونادا ايلا بغيتي تبرع راسك ..شارب بيبسي ومدلع نفسي..هدا نيكنايم كيدخل بيه ديما واحد المصري فالشاط.. معرفت أش فكرني بيه….كنت كنقول هاد كزوم تبارك الله عليه.. منحسدوهش.. الكلمة المتداوله هنا..هي تبعتوني.. كاين شي عشرة بحالو فنفس الصف..غير ديما النفاد عليه.. مكيبيعش حاجة خارقة للعادة ولكن الخارق للعادة هوا هاد الزحام..كلشي كيبغي يقصي عندو..علاش.. باش يتسمى واكل عند كزوم.. كيوقل ليا صاحبي أنو كيرش شي حا جة.. ولكن منظنش.. هدا ربي عطاه البركة..كانت محلبة معروفة ..الفصول ولكن دابا رجعات عادية ..غير باقي الناس كينعتوا بيها.. تسناني حدا الفصول..بقات ليها غير السمعة..


ولكن أحسن موضة دابة عندنا فالأحياء الشعبية طبعا..دوك المحلات ديال كرواصة والحلوى.. لا غلا على مسكين..خود للي بغيتي بعشرة ريال..وقت الفطور والكاسكروط كلش باغي يضرب كرواصة.. كيجي واحد عاجبو راسو كيقول للدرية للي كتبيع..اراي 20 بتيبانا.. ويدخل يدو فالفوقية.. سحاب ليه مخيم فسيدي بوزيد..ويعطيها 10 دراهم..ويمشي يعرج.. زعما عندو كلاكاج.. هادو كنحقد عليهم.. علاش معندناش فالمغرب طراقات بحال العراق.. والله تنخويها فشي قوم..المهم للي بغا ياكل ..5دراهم كافياه.. وللي باغي يتبوزق يمشي لدوك البلايص.. ولكن مينساش أن فالطوبيسات كيساليو معا 9 والموطور كيخسر فالطريق ..يعني هيرجع يبات هنا.. بلا ميحلم.. كلنا ولاد سيكتور واحد


http://joooba.maktoobblog.com